Оскар и дамата во розово

Краток опис

Секој ден гледај го светот како да го гледаш првпат.

Зашто тој може да биде последниот во твојот живот. За малиот Оскар, болен од рак, секој ден може да биде предодредениот ден за крај. Иако никој отворено не сака да му каже, а особено не неговите родители, тој сепак знае дека умира.

Мами Роз, најстарата од „дамите во розово“ кои се грижат за децата во болницата, му ја подарува смислата на последните денови од животот. Предлагајќи му да си играат дека секој ден се всушност десет години, Оскар на крајот на денот му пишува по едно писмо на Господ. Од првото со неверување дека може да постои, па сè до последното писмо, кога е свесен дека заминува кај него, ќе се променат многу нешта. Оскар за неколку дена ќе ги изживее и младоста и староста на својот живот – и љубов и разочарување, и соочување со суровата реалност и искрено признание, и лутина и прошка...

Со третата приказна од циклусот „Невидливиот“ Шмит му се обраќа на секој човек преку христијанството, нудејќи надеж и смисла дури и тогаш кога се чини дека не постојат. Безвременска книга која нѐ учи дека единствениот начин да го живееме правилно животот е да му приоѓаме како да ни е прв и последен ден во него.